Telegram cunsumadëures agost-setëmber 2011

L’istalaziun de deteturs de gas ne n’é nia obliënta

Tla ZCS röiel adalerch tres indô domandes che reverda n’ impresa che vënn da ćiasa a ćiasa deteturs de gas („rivelatore gas“) da 200 a 370 euro. A tröc consumadus ti él gnü dit che la istalaziun dl aparat é odüda danfora dala lege. Mo tl formular d’apostaziun él scrit che ara se trata dla venüda de n produt che ne n’é nia preodü dala lege. I consumadus ne n’é porchël nia oblià da lascè ite i rapresentanć dl aparat o da le cumprè. Che che à cumprè n te’ aparat po se trà zoruch dal contrat (art. 64 Dlg 206/2005) te 10 dis da canche ài l’à sotesscrit (tres lëtra racomanada cun avis de recioiüda). L’aparat mëss ti gnì ortié zoruch al’impresa; chësc cost é a ćiaria dl consumadù. De plü informaziuns ciàfon dai consulënć dla ZCS al numer de tel. 0471-975597.


Metede averda pro antizipaziuns por tratamënć dal dotur dai dënz

Al espert de doturs di dënz dla ZCS ti él gnü lascè alsavëi che a n valgügn paziënć ti él gnü proponü na bela reduziun dl prisc, sce ai paiâ döta la soma danfora. Cun n paiamënt antizipé pêrdon tl caje de problems vigni dërt. I désses tignì fora antizipaziuns por prinzip. I ne désses gnanca no stlü jö contrać de finanziamënt, mo tó sö sce al va debojëgn n credit personal pro osta banca de crëta. Tl caje de tratamënć ćers désson se fà fà n preventif da de plü doturs di dënz, ajache al é poscibl che üsc dënz sides sagns por n ater dotur di dënz.


WHO: Metede averda ales faziuns biologiches dles micro-ones

L’Agenzia internazionala por la inrescida sön le crebesc dla organisaziun mondiala dla sanité à tlassifiché i ćiamps eletromagnetics a frecuënza alta sciöche val’ che fej bonamënter gnì le crebesc, pian ia da n prigo plü alt por tumors al ciorvel maligns lié al adoranza de tecnologies de comunicaziun che funzionëia cun micro-ones: fonins, telefonns zënza cabl, WiFi.
Por smendrì la ćiaria de smog eletrich desson adorè plütosc la rëi fissa, destodé le fonin canche ara va y fà a manco inće pro la rëi fissa de radiotecnologies sciöche telefonns zënza cabl. Implü desson porvè da sensibilisé l’ambiënt incëria, por ej. te scora, sön le post de laûr, te mensa y te restaurant.


Aiazzone-Fiditalia: les bries pê por val’

La linia de lamentanzes sön la botëga de mebli Aiazzone ne s’archita nia. La situaziun é tres la medema: i mebli é gnüs apostà, mo nia (o ma en pert) condüć. Ajache la maiù pert di cumpradus à stlüt jö n contrat de finanziamënt por la cumpra de mebli cun la sozieté de credit coliada Fiditalia, mëssi paié les rates por mebli che ai ne n’à nia ciafè. Le titolar de Aiazzone Panmedia-SA à fat concurs d’aurì, y insciö mëss dötes les ghiranzes gnì fates avarëi tres l’aministradù dl concurs, y chësc fat é lié a tröpes domandes. La ZCS à porchël porvè da anulè i contrać de venüda y arjunje insciö cun les bunes n apajamënt di caji de lamentanza. Śëgn à Fiditalia finalmënter azetè la interuziun dl paiamënt a rates y garantì che an ćiararà da ciafè fora sce les somes paiades ite „zënza rajun“ é da rete. A chësc ti ćiararà i esperć dla ZCS avisa, a na moda che al ti vëgnes finalmënter reconesciü ai consumadus atocà sü dërć.


Pücia adoranza dla tarifa „soziala“ por proteses di dënz

Tl pröm mez ann dl 2011 s’à ma 20 paziënć anuzé dla tarifa soziala dles assoziaziuns di doturs di dënz ANDI, por porsones cun entrades basses. Che che po s’anuzé de chisc sorvisc, ći sorvisc che al vëgn pité y olâ che ai vëgn pità él nosc espert di doturs di dënz che ves dij al numer 345 8826990.
La ZCS lascia alsavëi che an po inće fà domanda de aiüt sozial finanziar dles comunitês raionales o dl’Aziënda Soziala de Balsan, sce le sorvisc ne n’é nia gnü pité dal sorvisc sanitar publich.


Cuta de bol sön depots de titui alzada

Le pachet de sparagn emanè cun decret legislatif dal Govern vëiga danfora dai 17 de messè dl 2011 inant n majer alzamënt dla cuta de bol sön i depots di titui al ann:

  • por depots ćina 50.000 euro: 34,20 euro
  • por depots de passa 50.000 y ćina 150.000 euro: 70,00 euro
  • por depots de passa 150.000 y ćina 500.000 euro: 240,00 euro
  • por depots de passa 500.000 euro: 680,00 euro.

Dal 2013 inant dess la cuta de debit al ann gnì alzada ćiamò n iade, y plü avisa aladô dla categoria dessura a 34,20 euro – 230,00 euro – 780,00 euro y 1.100,00 euro.
Al po ester che tröc pici sparagnadus vais sön i cunć d’investimënt porvia de chësc aumënt, inće ćiodi che dailò pon inće n’aprofité dla reduziun planificada dla cuta de fontana dal 27% al 20%.
Le consëi dla ZCS: no jì zënza ponsè sön investimënć de scioldi, che n’à nia da fà cun n aumënt.


Diretives sön la ćiasa clima nöies en forza

Dal pröm d’agost él en forza les diretives tecniches nöies por la ćiasa clima. Sön 67 plates vëgnel splighé i tröc detais che reverda la costruziun y le ressanamënt. Por i consumadusc ô les diretives tecniches nöies dì plü segurëza pro la cumpra, la costruziun y le ressanamënt de imobii – ajache les diretives tecniches nöies dà dant tröc detais – mo baldi inće de majeri cosć.
Pro na ćiasa da öna na familia é chisc cosć por la calcolaziun dla ćiasa clima cun laprò i documënć y i detais che va debojëgn de ca. 1.800 euro. Spo röiel ćiamò pormez i cosć por le blower-door-test - le test sön l’ermetizité - de ca. 600 euro, sciöche inće i cosć por la zertificaziun dla ćiasa clima. Chisc é pro n frabicat (ćina 500 m² de spersa de alzada netto) danter 840 euro y 1.200 euro aladô dla categoria de ćiasa clima. Chël é indöt passa 3.200 euro, cost de chël che al ne vëgn sovënz nia tignì cunt pro la calcolaziun.
Ćina ai 31 d’otober dl 2011 él la poscibilité de lascè fà la zertificaziun dla ćiasa clima aladô dles diretives tecniches vedles ( merz 2010). Porchël déssel pro la cumpra ćina d’otober gnì stlarì avisa aladô de ći diretiva che al mëss gnì fat la zertificaziun.
De plü informaziuns ciafëise chilò: www.verbraucherzentrale.it.


Relaziun sön le prisc di auti 2010
Püces mo impò de gran desfarënzies de prisc tla UE


La Comisciun Europeica à inće chësc isté, sciöche vigni ann, indô coiü adöm i prisc di auti di 89 modì d’auto plü venüs de 26 marćià tla UE; ara i à ressumè te na paridlada de prisc di auti y ciafè fora che: "Al é de pices desfarënzies de prisc pro auti nüs tla UE!" Porimpò pàiel la mëia da ćiarè sura i confins fora por i consumadus talians.
Sce i orésess se cumprè por ej. n Renault Clio, spo po le consumadù europeich inće sparagné ćina al 39,5% sce al ciafa fora le paîsc plü a bun marćé. Inće la minunga oramai surapassada che i auti talians sides plü bun marćé chilò da nos, ne ti corespogn nia a la realté sce an ti ćiara ala tabela de paridlada: i prisc dles tasses pro le Fiat Punto Evo tla Talia é söinsom, deperpo che chi por le Ford Focus é dessot.
Le link ala paridlada di prisc detaiada, sciöche inće na brosciüra cun consëis d’ütl sön l’importaziun personala de auti dal’UE ciàfon chilò: www.euroconsumatori.org.


Descriziun di alimënć: l’ascogna va inant

Do agn de discusciuns sön ći informaziuns che le consumadù dess ciafè tl dagnì tl supermarćé, à le Parlamënt dl’UE aprovè definitivamënter le regolamënt sön les informaziuns di alimënć. Fazit: l’industria alimentara s’à fat avarëi la maiù pert dles ghiranzes: degöna descriziun a semafer (vërt, ghel y cöce) y degönes informaziuns obliëntes sön le valur nudritif dancà. Insciö ne n’é les bombes de calories y de zücher inće tl dagnì nia da odëi a pröma odlada. Sön vigni confeziun mëssel gnì dé dant le valur energetich, i grasc, i aji grasc saturà, le zücher, le sè, les proteines y i carboidrać te na tabela. La maiù pert di produturs la metarà iadedô. L’atra manćianza reverda la grandëza minima de scritöra, ajache 1,2 milimetri é por tröc ćiamò „nia da lì“.


Ordöra y verzöra a Balsan
De gran desfarënzies de prisc, de mius indicaziuns de prisc


Ala fin de messè à la ZCS abiné adöm i prisc de 26 sorts de ordöra y verzöra te 5 posć de venüda a Balsan; chisc prisc é spo gnüs paridlà cun chi dla hala dl gran marćé a Verona (inće davert por la cumpra al menü). Aladô de na cumpra d’ejëmpl vëgnel fora chësta gradatöra: le post de venüda plü ćer a Balsan é le marćé tla str. Rovigo cun 34,94 euro, spo le marćé dla ordöra cun 32,18 euro, spo Frilo cun 21,21,28 euro, spo i supermarćià cun 20,00 euro y spo Lidl cun 15,13 euro. Tla hala dl gran marćé a Verona pàion 10,10 euro. Por ći che reverda la cualité él le marćé tla str. Rovigo che ti la stica a düć: le 98% di produć é produć de pröma categoria por ći che reverda la cualité y le 2% é de secunda categoria; le 91% di produć vëgn dala Talia y le 9% dal èster (Frilo à le 8% di produć de pröma categoria y le 92% de 2.). La indicaziun di prisc sön i marćià é miorada dassënn. I detais dla inrescida ciàfon sön www.verbraucherzentrale.it.

like-512_0.png

like-512_0.png